२४ कात्तिक, काठमाडौं । सोमबार साँझ बसेको मन्त्रिपरिषद् बैठकले सात महत्वपूर्ण निर्णयहरू गरेको छ । प्रधानमन्त्री तथा मन्त्रिपरिषद् कार्यालयमा बसेको नियमित बैठकका निर्णयबारे सरकारका प्रवक्ता सञ्चार, सूचना तथा प्रविधिमन्त्री जगदीश खरेलले जानकारी दिएका छन् । बैठकले नेपाल प्रहरीको महानिरीक्षकमा एआईजी दानबहादुर कार्कीलाई नियुक्त गर्ने निर्णय गरेको छ । मधेश प्रदेश प्रमुख सुमित्रा सुवेदी भण्डारीलाई पदमुक्त गरी सुरेन्द्र लाभ कर्णलाई सिफारिस गर्ने निर्णय भएको छ ।
सोही बैठकले भू–उपयोग तेस्रो संशोधन नियमावली, २०८२ र राष्ट्रिय परिचयपत्र तथा पञ्जिकरण दोस्रो संशोधन नियमावली, २०८२ स्वीकृत गरेको छ । भदौ २३ र २४ का घटनाको छानबिन आयोगका लागि थप कर्मचारी उपलब्ध गराउने निर्णय पनि भएको छ । साथै, भारतको नयाँ दिल्लीमा हुने नेपाल–भारत नवौं कोअर्डिनेशन बैठकमा सहभागी हुन सशस्त्र प्रहरी महानिरीक्षक राजु अर्यालको संयोजकत्वमा टोली स्वीकृत गरिएको छ । कर्णालीमा फागुन १ देखि ७ गतेसम्म दशौं राष्ट्रिय खेलकुद आयोजना गर्ने निर्णय पनि गरिएको छ ।
